Skip to content

Homai ō kōrero whakahoki e pā ana ki te Tirohanga Whāroa (Long-term Insights Briefing)

Homai ō kōrero whakahoki e pā ana ki te Tirohanga Whāroa (Long-term Insights Briefing)

Ko ngā Tirohanga Whāroa (LTIB) he herenga hou a te kāwanatanga i raro i te Public Service Act 2020. E here ana tēnei i ngā tari kāwanatanga ki te whakaaro whakamua kia tekau tau neke atu, te tirotiro i ngā ia anamata, ngā mōrearea me ngā āheinga tērā pea ka whai pānga i a Aotearoa. Ka whakatairanga ngā LTIB i ngā whakaaro pae tawhiti kia pai ake ai te noho o te ratonga tūmatanui ki te urupare ki ngā panonitanga anamata, ā, me te tuku i ngā hua mauroa mō ngā tāngata o Aotearoa. Ka kitea ētahi atu mōhiohio mō ngā LTIB i konei: Ngā-Tirohanga Whāroa | Te Tari o te Pirimia (DPMC)

Ko te kaupapa e marohitia ana e mātou hei whai whakaarotanga ko te — Hiki i te mana taurite raraunga Pasifika: Ngā āheinga hei whakarākei i te anamata o te oranga Pasifika. Nā te LTIB ka hua ake tētahi māramatanga hōhonu mō te mana taurite raraunga Pasifika hei āwhina kia whai mōhio ngā whakatau anamata me ngā kōwhiringa kaupapahere mō ngā iwi Pasifika.

I raro i te ture, e herea ana mātou ki te whakahaere i ngā huringa whakawhiti kōrero e rua ki te iwi tūmatanui, ki te whakarite i te whakaatatanga o ngā tirohanga tūmatanui i roto i tā mātou LTIB whakamutunga — ko te tuatahi e pā ana ki te kaupapa marohi, ā, ko te tuarua ko ngā ihirangi LTIB āmiki.

E rapu ana mātou i ngā whakahoki kōrero ā-tuhi, ā-waha hoki i runga i te kaupapa marohi LTIB. Kua whakawhanaketia e mātou tētahi tuhinga whakawhiti kōrero, ka taea te whakaoti i runga i tā mātou pae tukutuku. Ko tēnei tuhinga mō te huringa tuatahi o ngā whakawhiti kōrero tūmatanui. E whakarato ana tēnei i a koe ki ngā mōhiohio matua hei āwhina i ō kōrero whakahoki, tae atu ki ēnei pātai:

  1. He aha ō whakaaro ki ngā tautuhinga marohi mō te raraunga Pasifika me te mana taurite raraunga Pasifika?
  2. He aha ki a koe te tikanga o te raraunga Pasifika me te mana taurite raraunga Pasifika?
  3. E whakaata ana ngā kōrero e rongo ana koe mō ngā tatauranga/raraunga Pasifika i tō hapori?
  4. Me pēhea e tautoko pai ake ngā raraunga Pasifika i ngā hapori Pasifika?
  5. He aha ki a koe ngā āheinga nui rawa, ngā mōrearea rānei mō te mana taurite raraunga Pasifika?
  6. E whakaae ana anō koe ko te mana taurite raraunga Pasifika tētahi whakahohenga matua o te oranga Pasifika? He aha ai?
  7. He aha ō wawata mō ngā raraunga Pasifika i te wā nei, ā, mea ake nei hoki?
  8. He aha ētahi atu take, kaupapa rānei e hiahia ana koe hei tūhuratanga mā te Manatū i ngā LTIB i muri nei?
  9. He kōrero anō āu hei tuku mai?

Kei a koe te tikanga mō te nui o ngā kōrero whakahoki ki ngā pātai.

E wātea ana tētahi puka whakahoki kōrero i tā mātou pae tukutuku e whai āheinga ai koe ki te tuku kōrero hāngai, matatapu hoki.

Īmēra mai ki: [email protected]

Tuku ki:

Policy Branch , Ministry for Pacific Peoples , PO BOX 833  , Wellington 6140 , New Zealand.

Ā, ina hiahia koe kia whai wāhi mai ki ngā whakawhiti kōrero kaiwhaipānga, hei tauira, ngā hui awheawhe, ngā kōrero takitahi, tēnei toro mai ki a mātou i:  [email protected]

Ko te rā kati mō ngā whakahoki kōrero ko te 5:00pm ā te Rāmere 28 o Kohitātea 2022.

Homai ō kōrero whakahoki e pā ana ki te Tirohanga Whāroa (Long-term Insights Briefing)